Биыл Қазақстанның су шаруашылығы саласындағы мамандарының алғашқы легі Қытайға аттанды. Олар су ресурстарын басқару жүйелерін жоспарлау және іске асыру тәжірибесімен, сондай-ақ су ортасын кешенді сауықтыру технологияларымен танысуға арналған семинарға қатысып жатыр.
Семинар «Қазсушар» РМК мен Power China International Group Limited компаниясы арасындағы өзара түсіністік және ынтымақтастық туралы меморандум, сондай-ақ ҚР Су ресурстары және ирригация министрлігі мен ҚХР Су шаруашылығы министрлігі арасындағы ынтымақтастық жөніндегі меморандум аясында ұйымдастырылған.
Оқу бағдарламасы Чанша қаласында өтіп жатыр. Барлық шығынды Қытай тарапы өз мойнына алған. Алғашқы топ құрамында 34 маман бар. Жалпы жыл соңына дейін Қытайда шамамен 200 қазақстандық маман біліктілігін арттырмақ.
«Курстардың тақырыптық бағыты Қытайдағы су шаруашылығын жоспарлау және іске асыру мәселелерін, су ресурстарын әкімшілік басқаруды, судың ластануымен күрес саласындағы ҚХР мемлекеттік саясатын, су ортасын кешенді сауықтыру технологиялары мен олардың даму бағыттарын қамтиды. Сонымен қатар Қытайдың су шаруашылығы мен қалалық инфрақұрылым саласындағы тәжірибесін зерделеу мақсатында Чанша, Шэньчжэнь және Гуанчжоу қалаларына бару қарастырылған», - деді Су ресурстары және ирригация министрі Нұржан Нұржігітов.
Еске салсақ, былтыр Power China компаниясының базасында 125 қазақстандық су маманы біліктілікті арттыру курсынан өткен болатын. Соның нәтижесінде ҚР Су ресурстары және ирригация министрлігі мен Қытай тарапы биыл да бірлескен білім беру бағдарламасын жалғастыруға келісті.
