2025 жылғы 30 қыркүйекте Алматыда Қазақстанның Көлік апталығы аясында New Silk Way VII Халықаралық көлік-логистика бизнес-форумы өтті. Форум халықаралық көлік дәліздерін дамыту, нығайту және жаңғырту, транзиттік әлеуетті арттыру және Жаңа Жібек жолы кеңістігіндегі логистикалық инфрақұрылымды жетілдіру мәселелерін талқылау үшін саланың жетекші сарапшылары мен мамандарын біріктірді.
Алматы халықаралық әуежайы форумның демеушілерінің бірі болды және жүк тасымалы саласындағы негізгі жетістіктерін ұсынды. Әуежай атынан «Болашақтың әуе көлігі: тұрақтылық, цифрландыру және жаһандық тізбектерге интеграция» тақырыбындағы панельдік сессияда әуе маркетиңі және сату жөніндегі вице-президент Исмаил Озташ сөз сөйледі. Ол өз баяндамасында 2005 жылдан бері Алматыдағы жүк ағыны тұрақты өсіп келе жатқанын, 2025 жылға қарай орташа жылдық өсімнің шамамен 5% деңгейіне жеткенін атап өтті. 2019 жылдан бастап соңғы алты жылда жүк операцияларының орташа жылдық өсімі 17% құрап, әуежайдың карго бағытының қарқынды дамып келе жатқанын көрсетті.
2025 жылдың қорытындысы бойынша әуежай 10,4 мың жүк операциясын (cargo ATMs) өңдейді деп күтілуде. Әуежай желісін Qatar Airways Cargo, Turkish Cargo, Silk Way West Airlines, Air Incheon, SF Airlines және Sichuan Airlines сияқты әлемнің жетекші әуе тасымалдаушылары белсенді пайдаланады.
Алматы халықаралық әуежайы жүк тасымалының одан әрі өсуіне жағдай жасау үшін карго инфрақұрылымын жүйелі түрде дамытып келеді. Қазіргі карго-кешен заманауи қойма алаңдарымен, кросс-докинг аймақтарымен, контейнерлерге арналған терминалдық кеңістігімен, сондай-ақ қауіпті, бағалы және фармацевтикалық жүктерді сақтауға арналған арнайы үй-жайлармен жабдықталған. Барлық процесс толықтай автоматтандырылған және IATA мен ISO халықаралық стандарттарына сай. 2021 жылы әуежай IATA CEIV Pharma сертификатын алып, температураға сезімтал фармацевтикалық жүктерді қауіпсіз өңдеу қабілетін растады.
Қазіргі уақытта әуежайда карго инфрақұрылымын жаңғыртуға бағытталған бірнеше ірі жоба жүзеге асырылуда. Жаңа стеллаждық сақтау жүйесінің алғашқы кезеңі аяқталып, барлық кезең 2026 жылғы сәуірге қарай бітеді деп жоспарланған. 2025 жылғы қарашада Truck-to-Air модулі мен курьерлік терминал іске қосылып, экспорттық қуатты арттырып, қойма алаңдарын пайдалану тиімділігін 18%-ға жақсартпақ. Сонымен қатар 2025 жылы жабдықтарға инвестиция салу есебінен карго-кешеннің өткізу қабілеті 40%-ға, 2026 жылы тағы 30%-ға артады. Horizon бас жоспарына сәйкес, 2028 жылы жаңа жүк перроны мен заманауи карго-терминалы пайдалануға беріледі.
Бұл жобалар Алматы халықаралық әуежайына қуатын айтарлықтай арттырып, Орталық Азиядағы жетекші карго-хаб ретіндегі позициясын нығайтуға мүмкіндік береді.
