16 сәуір күні сағат 19:00-де Абай атындағы Қазақ ұлттық опера және балет театрының сахнасында әлемдік опера репертуарының танымал әрі драмалық туындыларының бірі —Ж.Бизенің «Кармен» операсы ұсынылады.
Қойылымдағы басты партияны — Дон Хозе партиясын италиялық тенор Алессандро Фантони орындайды. Ол — еуропалық опера сахнасында өзіндік орны бар, жоғары вокалдық мәдениетімен, көркемдік талғамымен және терең драмалық интерпретациясымен танылған өнер иесі.
Алессандро Фантони Еуропаның жетекші опера театрларында өнер көрсетіп келеді. Оның шығармашылық жолы Дания ұлттық операсымен, сондай-ақ Италия, Мысыр және Тунис сахналарымен тығыз байланысты. Әншінің гастрольдік географиясы кең, әрбір сахнада ол кәсіби шеберлігімен көрермен мен сыншылардың жоғары бағасына ие болып жүр.
Әншінің репертуарында итальяндық опера классикасының таңдаулы партиялары бар: «Травиатадағы» Альфредо, «Риголеттодағы» Герцог, «Богемадағы» Родольфо, «Тоскадағы» Каварадосси, «Трубадурдағы» Манрико және тағы басқа бейнелер. Оның орындаушылық мәнері дәстүрлі бельканто мектебі мен заманауи сахналық шешімдердің үйлесімінен тұрады. Сонымен қатар, ол халықаралық вокалдық байқаулардың, соның ішінде беделді «Una voce per l’Arena» конкурсының лауреаты.
Алессандро Фантонидің Дон Хозе бейнесі — күрделі психологиялық құрылымға ие образ. Әнші кейіпкердің ішкі жан дүниесін терең ашып, оның адал сезімнен басталып, қайғылы тағдырға ұласатын жолын әсерлі жеткізеді. Әрбір музыкалық фраза сезімге толы, ал вокалдық орындау ерекше нәзіктік пен эмоционалдық тереңдікке негізделген.
«Кармен» операсы — еркіндік, махаббат және тағдыр тақырыптарын қозғайтын мәңгілік шығарма. Ж.Бизе музыкасының жарқын әуездері, испандық ырғақтары мен драмалық шиеленісі бұл туындыны әлемдік классиканың інжу-маржанына айналдырды.
Абай атындағы Қазақ ұлттық опера және балет театрының сахнасындағы бұл қойылым жоғары көркемдік деңгейімен, ауқымды сахналық шешімімен және кәсіби орындаушылық құрамымен ерекшеленеді. Халықаралық солистің қатысуы спектакльдің маңызын арттырып, оны Алматы қаласының мәдени өміріндегі елеулі оқиғалардың біріне айналдырады.
Алдағы кеш опера өнерінің шынайы құндылығын сезінуге мүмкіндік беретін, музыка мен драматургия үйлесім тапқан ерекше мәдени оқиға болмақ.
