Айыртау ауданында заманауи IT-орталық ашылды. Бұл – облыстағы 13-ші цифрлық хаб. Облыста жүзеге асырылып жатқан «Digital Aimaq» жобасы қорытынды кезеңіне аяқ басты. Айыртау ауданының Саумалкөл ауылында заманауи IT-орталық ашылды. Цифрлық хаб «BotAi CREATIVE IT CENTER» деп аталады. Басты мақсат Ботай мәдениетінің археологиялық мұрасын заманауи технологиялармен ұштастыру.
Орталық республикалық «Ботай» музей-қорығымен бірлесіп жұмыс істейді. Аталмыш нысанға «Робототехника және ұшқышсыз ұшу аппараттарын басқару аймақтары», «GameDev» (ойын әзірлеу) және медиаөндіріс студиялары», «Киберспорт алаңы мен коворкинг кеңістігі», «Бағдарламалау негіздерін оқытатын IT-сыныптар» кіреді.
Облыс әкімінің тапсырмасына сәйкес, орталықтардың жұмысы нақты KPI көрсеткіштеріне бағытталған. Туристік әлеуеті жоғары Айыртау ауданы үшін бұл IT-орталық туристік қызметтерді цифрландыру мен қауіпсіздік сервистерін дамытуға серпін береді. Орталықтың ашылуы аясында дрон технологияларын енгізу, сондай-ақ мемлекеттік қызметшілер мен аудан кәсіпкерлерінің цифрлық құзыреттерін дамыту жөнінде бірқатар меморандумдарға қол қойылды.
Айыртау ауданы – Шоқан Уәлиханов, Ақан сері, Үкілі Ыбырай, Орынбай ақын сияқты бірегей тұлғалардың өсіп-өнген жері. Бүкіл дүние жүзіне әйгілі «Ботай», суы Қара теңіздікіндей Шалқар көлі, табиғаты әсем Сырымбет. Имантау таулары, Айғаным қонысы да – осы ауданда орналасқан.
Облыс әкімінің баспасөз қызметі материалдары бойынша әзірленді.
