Биыл Қазақстан халқы Ассамблеясының өмірге келгеніне 30 жыл толады. Осы айтулы датаға орай ел көлемінде әртүрлі іс-шаралар ұйымдастырылып, татулық пен достықтың бірегей үлгісін көрсетіп келе жатқан ұйымның қызметіне жан-жақтылы қолдау көрсетіліп жатыр.
Сәуір айының басында Астанадағы Қазақстан Республикасы Қарулы күштері әскери-тарихи мұражайында ҚХА-ның 30 жылдығына орай «Жан DoStar: бір аспан астында» атты VIII Республикалық өнер фестивалі болып өтті. Шарада сонымен қатар жас мемлекеттің қалыптасу, көркею жолында ҚХА-ның атқарған қызметі мен Қазақстан қоғамында бірлік пен татулықты, мәдениетаралық диалогты ілгерілетудегі үлесі аталып өтті.
Аталмыш фестиваль 2022 жылдан бері қарай дәстүрлі түрде өтіп келеді. Шараны ұйымдастырушылардың айтуынша, 3 жыл ішінде Қазақстанның түкпір-түкпірінен төрт мыңға жуық талантты бала қатысыпты. Ал кезекті рет өткен VIII Республикалық өнер фестиваліне еліміздің әр өңірінен 500-ге жуық адам қатысқан екен.
Мерекелік шараға Қазақстан халқы Ассамблеясы Төрағасының орынбасары – ҚХА хатшылығының меңгерушісі Марат Әзілханов және этномәдени бірлестіктер мен ҚХА қоғамдық құрылымдарының өкілдері қатысты.
