Ислам ынтымақтастығы ойыны: Қазақстан 5-орында

   Түркияның Конья қаласында Қазақстан құрамасының қатысуымен өткен V Ислам ынтымақтастығы ойындары аяқталды. 54 ислам мемлекеті спортшыларының қатысуымен өткен жарыста қазақстандық спортшылар делегациясы 89 жүлдеге ие болды, оның 27-сі – алтын, 23-і – күміс және 39-ы – қола медаль. Қазақстан намысын жарыстың 16 түрі бойынша 125 спортшы қорғады. Екі апталық шайқастардың қорытындысы бойынша қазақстандықтар жеңіс тұғырының ең биік сатысына 27 рет көтеріліп, жалпыкомандалық медальдық есепте 5-орыннан көрінді. Ал Ислам ойындарының көшбасшысы Түркия болды. Түріктердің еншісінде 341 медаль бар: 145 алтын, 107 күміс және 89 қола. Олардан кейін Өзбекстан, Иран және Әзербайжан тұр. Салыстыру үшін айта кетсек, 2017 жылы өткен IV Ислам ынтымақтастығы ойындарында Қазақстан құрамасы сапында спорттың 7 түрінен 35 спортшы қатысқан еді. Нәтижесінде қазақстандықтар 2 алтын, 5 күміс және 12 қола медальмен жалпыкомандалық есепте 14-орынға тұрақтаған еді.