Бүгін аудан әкімі Сәкен Мамытов 8 наурыз - Халықаралық әйелдер күні мерекесіне орай, Игілік ауылының тұрғыны, 103 жастағы Бибайша Өмірбаеваның шаңырағына барып, мерекемен құттықтады. Батыр анаға гүл шоқтарын тапсырып, сый - сыяпат жасады.
Абыз ананы құттықтауға аудан әкімімен бірге аудандық ардагерлер кеңесінің төрағасы Серік Аппазов, аудандық алқабилер кеңесінің төрағасы Қалмырза Жандарбек те бірге барды.Өмірбаева Бибайша 1922 жылы 1 қаңтарда Шкалов колхозы, қазіргі Сарысу ауданы Өндіріс ауылында дүниеге келген. 1941-1950 жылдары соғыс зардабынан бұзылған жерлерді қайта қалпына келтіруге қатысқан.1950-1960 жылдары Комунар совхозында жүгері егуге қатысып (звеновод) сілтемеші болып жұмыс атқарған.
1960 жылдары Комунар совхозында ағаш өңдеу цехында жұмыс атқарған. 1970-1980 жылдары егін шаруашылығында, мақта және қызылша жинау жұмыстарын атқарған.
1980 жылы зейнетке шыққан. Соғыс ардагеріне теңестірілген батыр ана.
Ғасыр жасаған Бибайша әжей аудан басшылығына ризашылығын білдіріп, елдің амандығын тіледі.
