Абай облысының Абай ауданында ерекше күтімді қажет ететін азаматтарға арналған Арнаулы әлеуметтік қызметтер көрсету орталығының құрылысы қарқынды жүргізілуде.
Бұл маңызды нысан – «Ауылын көріп, азаматын таны» жобасының нақты нәтижесі. Жоба аясында ауыл тұрғыны Сейфолла Рахымбаев өз иелігіндегі екі қабатты кең ғимаратты мемлекет меншігіне сыйға тартты. Құрылыстың өзге бөліктері ҚР Ұлттық қоры есебінен қаржыландырылуда.
Жаңа мекеме заманауи инфрақұрылыммен жабдықталып, ерекше күтімді қажет ететін жандарға жан-жақты әлеуметтік қолдау көрсетуге бағытталады.
Бүгінде құрылыс жұмыстарының 75 пайызы аяқталған. Құрылыс алаңында 6 жұмысшы мен 1 арнайы техника жұмылдырылған. Қазіргі уақытта брусчатка төсеу, кәріз жүйесін тарту, ғимараттың сыртқы қаптамасын орнату және аумағын қоршау жұмыстары жүргізілуде.
Орталықтың ашылуы ұлы ойшыл Абай Құнанбайұлының 180 жылдық мерейтойы қарсаңында, тамыз айына жоспарланған.
