14–15 қарашада Алматы NASA Space Apps Challenge — ең ірі халықаралық хакатонға қосылады. Ол жыл сайын әлемнің 160 елінде 30 мыңнан астам қатысушыны біріктіреді, енді Алматы жастары да осы жаһандық ғылыми қозғалыстың бір бөлігі бола алады.
Қазақстанда хакатон бірден алты қалада — Алматы, Павлодар, Петропавл, Шымкент, Өскемен және Оралда өтеді. Ұйымдастырушы — АҚШ Дипломатиялық миссиясы мен Chevron компаниясының қолдауымен жұмыс істейтін Makerspace Expands! Алматы қаласында өткізу алаңы American Corner & Makerspace Almaty болады, онда оқушылар, студенттер және жас мамандар екі күндік зияткерлік марафон үшін бас қосады.
Қатысушылар NASA-ның нақты деректеріне негізделген міндеттермен жұмыс істейді: климат пен экологияны зерттеуден бастап жаңа технологиялық шешімдерді іздеуге дейін. Бұл — жай ғана идеялар байқауы емес, шығармашылықтың, командалық жұмыстың және болашаққа көз тіге білудің нағыз сынағы. Үздік жобалар жаһандық кезеңге шығу мүмкіндігіне ие болады, онда олардың жұмыстарын NASA, ESA, JAXA, CSA және CNES сарапшылары қарайды. Жаһандық турдың жеңімпаздары халықаралық ғарыш агенттіктері деңгейінде мойындалады, сондай-ақ өз шешімдерін бүкіл әлемдегі кең ғылыми және инженерлік аудиторияға таныстыру мүмкіндігін алады.
«NASA Space Apps Challenge — ғарыш пен әлемдік ғылымның біз ойлағаннан да жақын екенін сезінуге мүмкіндік береді. Дәл Алматы енді осы шараның хост-қалаларының қатарында болғанына мақтанамыз. Жастар үшін бұл — өзін және өз идеяларын халықаралық деңгейде танытуға берілген мүмкіндік», — дейді Қазақстандағы NASA Space Apps Challenge жергілікті жетекшісі Умидярова Жанара.
Хакатон күздің жарқын оқиғасына айналып, Алматы қаласын идеялар, технологиялар мен талантты жастар қаласы ретінде танытуға мүмкіндік береді. Қатысу тегін, бірақ алдын ала тіркелуді талап етеді.
-
Email: z.umidyarova@kz.americanspaces.info
-
Әлеуметтік желілер: @americancorner_almaty
